Liebe Stöff

Ich vermisse dich mega fescht….du, euise Brüeder, Papi vo de Mona und em Ennio, Sohn vo de Ruth und em Beat, Fründ vo eui allne, häsch dich uf de Weg gmacht für neui Abentür. So vieli schöni Erinnerige begleitet euis i dere Zit vom Abschid nä! Ich denke oft a euisi mega schön Chindheit in Meile, die Zit am Fähresteg, s’fische und s’Schibe putze vo de wartende Autos zum euises Sackgeld ufzbessere…..am Mittwuchnamittag simmer immer die erschte gsi, wenn s’Brocki ufgange isch und wenns bim Spiele mal Striit gä hät, häsch du mich immer verteidigt….ja bisch halt min grosse Brüeder gsi und wenn alli Strick grisse händ, hämmer zum Glück no euisi gross Schwöschter Claudia gha, sie isch immer hinder euis gstande!

Die viele Ferie im Tessin mit de ganze Familie händ mir immer sehr gnosse, mir händ nöd viel gha, defür euisi Familie….Claudia, weisch no wie er amigs hät chöne
de Clown mache…

Bald häsch du bim FC Meile mit tschutte agfange, die Zit häsch immer gliebt, au wenn du mit dim Grechtigkeitssinn oft Problem mit de Trainer gha häsch und ich mängisch denkt han, nimms easy Brüeder, dini Ehrlichkeit isch dir wichtiger gsi.

I de Oberstufe z’Meile, häsch den entdeckt, dass es nöd nur Fuessball git. Entdeckt häsch aber nöd s’Lerne, sondern d’Fraue…..es hät den vieli Fez und Grümpis gäh, wo du so richtig Party gmacht häsch…Stöff du bisch grossartig gsi…

Ich vergiss au nie meh, wo du mich mit 13i as Bon Jovi Konzert mitgnah häsch, ja du häsch mich mega viel mitgnah, din chline Brüeder, ich vermisse dich so fescht….so viel han ich vo dir glernt.

Im Militär, s’isch nöd dini bescht Zit gsi, isches halt besser, wenn mer au mal ufs Mul hocke chan….du häsch dich aber immer für dini Kamerade igsetzt und die Strafe kassiert. Am Bsuechstag bim Mittagesse, wos no vorige Dessert gha hät, bisch du vor alli anegstande und häsch so lut wie du häsch chöne grüeft:
Jedi Frau wo no en Dessert holt, bechunt en Kuss vo mir……

Ja es isch nöd immer liecht gsi für euisi Eltere, aber sie sind die allerbeschte Eltere und stönd immer hinder euis.

Nach de RS häsch nomal ä Lehr als Schriner gmacht, s’Schaffe mit Holz hät dir immer gfalle.
I dere Zit bisch du au dihei uszoge und häsch vieli Jahr mit em Thomas, Carlo, Urbi und vielne andere zämegwohnt, vieli sind Fründe fürs Läbe blibe.

Am Wucheend simmer oft zäme um d’Hüser zoge und händ Züri unsicher gmacht, ja mir sind jung und wild gsi, es git so vieli Storys, ich chänt es Buech schribe. Nur scho über all dini Unfäll, mit em Velo a de Fähre in See gfahre oder bi de UBS Slalom um Pfiler gfahre, Ingemar Stenmark häsch grüeft und s’Nasebei 3 Täg vor de 1. Kommunion broche! Hät mega Föteli gäh. Au ä gueti Idee hämmer gha, wo mir mit em Skate vom Pfanni abegfahre sind, du häsch natürlich beidi Ärm broche….S’letscht isch nanig so lang her, hämmer denkt Motocross wär doch au no cool, leider häsch du dir denn din Fuess zertrümmeret…ja, es isch ä super Zit gsi, danke vielmal Stöff.

Irgendwänn wird’s aber bi allne chli ruhiger und de Christoph hät Barbara kenneglernt, Love was in the Air, sie händ zäme ganz viel schöni Sache erläbt. Mit de Geburt vom Ennio und de Mona sind ihr ä Familie worde. Vom erschte Tag ah sind dini Chind für dich s’Wichtigschti gsi und du bisch so unheimlich stolz uf sie. Du läbsch i ihne wiiter.

D’Summerferie in Casalabate häsch immer gliebt, s’Meer, d’Sunne und d’Eifachheit hät dir immer guet da. Au wenn du Fotis vo de Skiferie in Splügen gschickt häsch, häsch immer glücklich usgseh. Barbara, ich han i de letschte Jahre so oft denkt, so wie ihr das mached, söt mer eui en Orde verleihe! Ennio und Mona, ich bin so froh gits eui!

Die Zit, wo mir zäme gschaffet händ, häsch du mir immer wieder gseit, dass das für dich eini vo de beschte Zeite gsi isch, ja, für mich au! Mir – du, de Urbi und ich, sind wie ä grossi Familie gsi, danke au für die Zit..

Au mit Familie bisch immer für euis alli da gsi und häsch euis mit dinere Art immer wieder zum Lache bracht……D’Ferie mit de Jungs in Portugal sind au legendär gsi…..Ja äs gäbt no so viel zum verzelle, aber ihr alli händ de Stöff ja kennt und werded ihn, jede für sich und uf sini Art, in Erinnerig bhalte…..

Dä Stöff isch en HERZ Mensch gsi… euisi Familie und ich danked eui allne für die mega Unterstützig i dere schwere Zit….

Liebe Stöff, jetzt isch Zit zum tschüss säge, ich lieb dich für immer….
STÖFF FOREVER……….

Din Brüeder Macho